«Nasaf» Osiyo chempionlar ligasi guruh bosqichi doirasida 5-tur bahsini o‘z maydonida Iordaniyaning «Al-Faysaliy» klubiga qarshi o‘tkazdi.

Qarshiliklar birinchi bo‘limda raqib mudofaasini yorib o‘tishga qiynalishdi. Boz ustiga, birinchi taymga qo‘shib berilgan 6-daqiqada Siddiqov maydon markazida to‘pni raqibga oldirib qo‘ydi. Natijada iordaniyalik futbolchi darvozabonimiz bilan yakkama-yakka vaziyatga chiqib ketib, hisobni ochdi.

Ro‘ziqul Berdiyev shogirdlari ikkinchi bo‘limga katta ishtiyoq bilan chiqib kelishdi. Ular ilk 5 daqiqa oldinga o‘tib olishgan bo‘lsa, 15 daqiqa ichida o‘yin taqdirini hal qilib qo‘yishdi. Dastlab qanotdan yetkazilgan to‘pni Mateus Lima bosh bilan darvozani burib yuborgan bo‘lsa, 50-daqiqada Zafarmurod Abdurahmatov 18 metrlardan kuchli zarba bilan jamoasini oldinga olib chiqdi.

60-daqiqada "Nasaf" shundoqqina jarima maydoni ostonasida jarima zarbasini ishladi. Marko Stanoyevich esa o‘sha pallada zaxiradan maydonga tushdiyu, ilk zarba bilan to‘pni jonli devor ustidan oshirib, darvoza burchagiga joylab qo‘ydi — 3:1.

Shundan so‘ng qarshiliklar biroz xotirjamlikka berilishdi. Natijada 84-daqiqada "Nasaf" darvozasi tomon penalti belgilandi. Obida as-Samrih tomonidan yo‘llangan zarbani esa Abduvohid Ne’matov qaytarishga muvaffaq bo‘ldi.

"Faysaliy" shundan keyin ham vaziyatni o‘zgartirishga harakat qildi, ammo mezbonlar g‘alaba ushlab qolishga erishishdi.

"Nasaf" ushbu g‘alaba tufayli o‘z ochkolarini 10 taga yetkazib, "B" guruhi peshqadamiga aylandi. Boisi, 4-turdan keyin 8 ochko bilan yetakchi bo‘lib turgan "Sharja" o‘z uyida Qatarning "As-Sadd" klubiga imkoniyatni boy berdi.

OCHL, «B» guruhi, 5-tur
"NASAF" - "AL-FAYSALIY" - 3:1 (0:1)
Gollar: Mateus Lima (47), Zafar Abdurahmatov (50), Marko Stanoyevich (60) — Roziq Bani Hani, 45+6 (0:1)
Noaniq penalti: Obida as-Samrih (84, "Al-Faysaliy") — darvozabon qaytardi