"Al-Hilol" himoyachisi Ruben Nevesh yaqinlashib kelayotgan transfer oynasida ijara asosida Angliyaning "Nyukasl" klubiga o‘tishi mumkinligi haqidagi mish-mishlarga izoh berdi.

"Men "Nyukasl"ga bormayman. Men bu yerda yaxshi ishlayapman va "Al-Hilol"da qolmoqchiman", — dedi Nevesh BBC Sport bilan suhbatda.

Eslatib o‘tamiz, avvalroq OAVda portugaliyalik futbolchi Saudiya Arabistoni davlat investisiya jamg‘armasiga tegishli bo‘lganligi sababli “Nyukasl” safiga bemalol ko‘chib o‘tishi haqida mish-mishlar tarqalgan edi.

Joriy mavsumda 26 yoshli futbolchi barcha musobaqalarda 19 ta uchrashuvda ishtirok etib, ikkita gol va 3 ta golli uzatmaga mualliflik qilgan. Transfermarkt portalida berilgan ma’lumotlarga ko‘ra, futbolchining bozor qiymati 40 million yevroni tashkil qiladi.