"Manchester Yunayted" vingeri Markus Reshford "Bavariya" bilan oxirgi Chempionlar ligasi o‘yinini (0:1), shuningdek, norovirus deb ataladigan o‘tkir virusli ichak infeksiyasi tufayli "qizil iblislar"ning bir necha mashg‘ulotlarini o‘tkazib yubordi. Bu haqda Daily Mail nashri xabar bermoqda.

Manba bergan xabarga ko‘ra, angliyalik futbolchi hozirda o‘zini yaxshi his qilmoqda va u allaqachon klubning asosiy jamoasi bilan mashg‘ulotlarga qaytgan.

Norovirus ko‘pincha yilning sovuq oylarida paydo bo‘ladi, shuning uchun u "qishki qusish" deb ataladi. Uning belgilari ko‘ngil aynishi, qusish va isitma shaklida o‘zini namoyon qiladi. Ushbu virus yuqori darajadagi yuqumli kasallik bilan tavsiflanadi.

Joriy mavsumda Reshford barcha turnirlarda 20 ta o‘yinda qatnashib, 2 ta gol va 4 ta golli uzatmaga mualliflik qilgan.