Fermin Lopes hech kim kutmagan vaqt «Barselona» tizimidagi asosiy jamoa tarkibiga yorib kirdi.
Umuman, yosh yigitchaning joriy mavsumga bog‘liq statistikasi hattoki, o‘zi uchun ham yoqimli «syurpriz» bo‘lganini bemalol ta’kidlash mumkin: 17ta o‘yinda 712 daqiqa harakat, 2ta gol va 1ta assist. El 10 del Barsa dasturi shularni e’tiborga olib, yarim himoyachini suhbatga chorladi va u jurnalist-larning eng dolzarb savollariga qisqa-qisqa javob berdi.
- Xavi «Barselona» uchun Aleks Fergyusondek murabbiy bo‘lishi mumkinmi, unga yana imkoniyat berish kerakmi yoki...?
- Shundan umidvorman. Xavi shaxsan menda o‘z salohiyatimga nisbatan ishonchni keskin oshirdi, katta orzu bilan ishlash va yashashni o‘rgatdi tom ma’noda. Bugun shunday murabbiy qo‘l ostida shug‘ullanayotganimdan bag‘oyat baxtliman.
- Ukangiz esa ma’lum muddat «Real» tizimida shug‘ullandi...
- Ha, shunday, lekin u hozir boshqa klub ixtiyorida. Ukam yorqin tomonga o‘tdi (kuladi).
- «Real» haqidagi El Chiringuito hazillarini hech ko‘rdingizmi?
- Hozir ko‘rmayapman, lekin ilgari ko‘p tomosha qilardim. Bolaligimda miriqib kulardim ham...
- Xavi OAV jamoaga kuchli ta’sir o‘tkazayotganini aytmoqda...
- Aslida matbuot bizga jiddiy ta’sir ko‘rsatolmaydi, lekin oxir-oqibat, ba’zi ma’lumotlar yigitlarga yetib keladi. Fakt shuki, e’tiborni tortish va ta’sir ko‘rsatish o‘rtasida katta farq bor. Murabbiy so‘zlariga kelsak, tashqarida chindan ham, «Barsa»ga qaratilgan zaharli muhit bor va bu yaxshi emas.
- «Barselona» futbolkasida qanday gol urishni istardingiz?
- Bilmayman... Deylik, CHL finalida «Real» darvozasini nishonga olish imkoniyatiga qarshi emasman. Albatta, agar imkoni bo‘lsa... Umuman, har qanday o‘yinda xohlagan raqib darvozasiga gol urish yoqimli, baribir.
- Ayni holatda «Real»ning qaysi futbolchisini «Barsa»da ko‘rishni xohlardingiz?
- Hech birini! Barcha eng yaxshi futbolchilar bizning tarkibimizda.
- Kim zo‘rroq: Gavi yoki Bellingem?
- Javob aniq, aytishim shart emas.
- «G‘orliklar» («Real»ning maqtoviga zid har narsaga qarshi «madridchilar» laqabi) Gavini qo‘pol futbolchi sifatida «ta’riflashmoqda», uni nazarga ilishmayapti. Bunga nima deysiz?
- Gavi o‘yinini hech qachon ko‘rmagan yoki uni umuman bilmaydigan kishigina shunday deyishi mumkin. Haqiqat shuki, Gavi eng kuchli fazilatlar sohibi - jamoamiz uchun juda muhim yigit.
- «Barselona» tarixida siz uchun eng sehrli lahza qaysi?
- Tarkibda Messi, Inyesta, Buskets, Xavi o‘ynagan vaqt... Muayyan o‘yinmi? «Kamp Nou»da «Real» 5:0 hisobida tor-mor etilgan bahs, yana «Madrid» zaxira o‘rindig‘i oldida Pike va Mourinyo o‘rtasida yuzaga kelgan to‘qnashuv.
- Aytana Bonmati Cadena Cope reportajiga javoban ijtimoiy tarmoqlarda keskinroq fikr bildirdi: «Futbolchilar katta kuch hisoblanadilar va muayyan voqealikka munosabat bildirishlari uncha to‘g‘ri emas»...
- Ha, buni o‘qidim. Ba’zan qaynoq nuqta o‘rtasiga tushishingiz yaxshi. Ammo ommani chalg‘itmaslik uchun keskin gapirishdan qochish ma’qulroq.
- Robert Levandovski qanday inson?
- Juda ta’sirli, har doim yordam berishga urinadi. Umuman, Robert va Gyundogan kabi tajribali futbolchilar hamisha yoshlarni qo‘llab-quvvatlashga shay turishadi. Jamoa faxriylaridan tanbeh ham eshitamanmi? Agar ular biror jahatdan qoniqishmasa, koyishadi, albatta. Professional ish jarayoni talabi - shu.
M.PO‘LATOV tayyorladi
