O‘zbekiston milliy terma jamoasi hujumchisi Jaloliddin Masharipov Suriyaga qarshi o‘yindan oldingi matbuot anjumanida o‘z fikrlarini bildirdi.

"Osiyo kubogida ikkinchi marotaba ishtirok etayotganimdan juda xursandman. Umid qilamizki bu yerda yaxshi natijalar qayd etamiz. O‘zbekistondan anchagina muxlislar bu yerga bizni qo‘llab-quvvatlagani yetib keldi.

Oldigi Osiyo kubogidagi terma jamoa tarkibidan Eldorning jarohati sabab hozirda faqat ikki kishi qoldik. Hozirgi terma jamoamizda avvalgisiga qaraganda ko‘proq o‘yin uslubi va ishonch bor. Oldigi termadagi futbolchilarda nomlar bizdan yaxshiroq bo‘lishi mumkin, lekin hozir bizda birdamlik kuchliroq.

Osiyo kubogidagi birinchi ishtirokim ham yomon bo‘lmagandi, guruhdan chiqqanimizdan so‘ng pley-offda Avstraliyaga mag‘lub bo‘lgandik. O‘ylaymanki, hozir bizda juda yaxshi terma shakllangan. Buni Eronga qarshi JCH saralash o‘yinida ko‘rsatdik. Bu turnir biz va muxlislarimiz uchun juda omadli o‘tishini kutyapman. Barchada ishonch yuqori, kamida kuchli to‘rttalikka kirishimiz kerak.

Oldin terma jamoada bir yoki ikkita lider bo‘lardi. Qiyin uchrashuvlarda ularning o‘yini chiqmasa, yutqazib qo‘yardik. Hozir boshqacha, ba’zida bizda asosiy tarkibda tushgan futbolchidan ko‘ra zaxirdan tushgan o‘yinchi ko‘proq samarali harakat qilgandek ko‘rinadi. Bu degani hozirgi terma juda yaxshi shakllanganidan xabar beradi. Hozir biz o‘zimizdagi kuchli ishonch tufayli ham yutib ketamiz deb o‘ylayman.

Osiyo kubogida ilk bor ishtirok etadigan bir qancha futbolchilar allaqachon katta o‘yinlarda maydonga tushish tajribasiga ega. O‘ylaymanki, bu debyut yosh futbolchilarimizga qiyin bo‘lmaydi deb umid qilaman", - deb fikrini yakunladi Masharipov.