"Aston Villa" qishki transferlar vaqtida "Midlsbro" vingeri Morgan Rojersni sotib olmoqchi.

Jurnalist Fabrisio Romanoning xabar berishicha, Birmingem klubi allaqachon Chempionship jamoasiga rasmiy taklif yuborgan.

Ma’lumotlarga ko‘ra, 21 yoshli iqtidorli Rojers "Aston Villa" bosh murabbiyi Unai Emeri uchun ushbu transfer oynasining asosiy maqsadi bo‘lib turibdi.

Manbaning ta’kidlashicha, futbolchining o‘zi ham kuchli klubga ko‘tarilishni juda xohlaydi. Joriy mavsumda Rojers barcha musobaqalarda 31 ta o‘yinda qatnashib, 6 ta gol urdi va 8 ta golli uzatmani amalga oshirdi.

“Aston Villa” hozirda 21 turdan keyin 43 ochko bilan APL turnir jadvalida uchinchi o‘rinda bormoqda.