"Inter" hujumchisi Lautaro Martines manfaatlarini himoya qiluvchi futbol agenti Alexandro Kamano mijozining shartnomasi bilan bog‘liq hozirgi vaziyat haqida gapirdi.
“Lautaro juda yuqori saviyada o‘ynaydi. Kelishuvga kelish oson emas, ko‘p jihatlarni muhokama qilish kerak. Shu kungacha “Inter” bilan kelishuvga erisha olmadik. Biroq biz xotirjamlikni saqlaymiz va klub rahbariyati bilan yangi muzokaralarga tayyorgarlik ko‘ryapmiz. Bizda hali ko‘p vaqt bor. Bugun Lautaro bor e’tiborini A Seriya va Chempionlar ligasida muvaffaqiyatga erishishga qaratgan", - deya Kamano so‘zlarini keltirmoqda Football Italia.
Eslatib o‘tamiz, argentinalik futbolchi “Inter” safida 2018 yildan buyon o‘ynab kelmoqda. Joriy mavsumda hujumchi “neradzurrilar” safida barcha rasmiy turnirlarda 26 ta o‘yin o‘tkazib, 20 ta gol va 5 ta golli uzatmani amalga oshirdi.
