"Интер" ҳужумчиси Лаутаро Мартинес манфаатларини ҳимоя қилувчи футбол агенти Алехандро Камано мижозининг шартномаси билан боғлиқ ҳозирги вазият ҳақида гапирди.
“Лаутаро жуда юқори савияда ўйнайди. Келишувга келиш осон эмас, кўп жиҳатларни муҳокама қилиш керак. Шу кунгача “Интер” билан келишувга эриша олмадик. Бироқ биз хотиржамликни сақлаймиз ва клуб раҳбарияти билан янги музокараларга тайёргарлик кўряпмиз. Бизда ҳали кўп вақт бор. Бугун Лаутаро бор эътиборини А Серия ва Чемпионлар лигасида муваффақиятга эришишга қаратган", - дея Камано сўзларини келтирмоқда Football Italia.
Эслатиб ўтамиз, аргентиналик футболчи “Интер” сафида 2018 йилдан буён ўйнаб келмоқда. Жорий мавсумда ҳужумчи “нерадзуррилар” сафида барча расмий турнирларда 26 та ўйин ўтказиб, 20 та гол ва 5 та голли узатмани амалга оширди.
