"Fiorentina" "Atlanta Yunayted" va Argentinaning hujumkor yarim himoyachisi Tyago Almada bilan shartnoma imzolamoqchi. Bu haqda Football Italia xabar bermoqda.

Manbaga ko‘ra, "binafsharanglilar" vakillari allaqachon Amerika klubi bilan bog‘lanib, 22 yoshli futbolchining ehtimoliy transferini muhokama qilishgan. "Atlanta" hujumkor futbolchisi uchun taxminan 25 million yevro so‘radi, biroq "Fiorentina" hali bunday mablag‘dan voz kechishga tayyor emas. Qayd etilishicha, futbolchining o‘zi A Seriyaga o‘tishga qiziqmoqda.

Almada 2022 yildan beri "Atlanta Yunayted"da o‘ynab kelmoqda. O‘tgan mavsumda yarim himoyachi barcha turnirlarda 35 ta o‘yin o‘tkazib, 13 ta gol va 19 ta golli uzatmani amalga oshirgan. Futbolchining Amerika klubi bilan shartnomasi 2025 yil oxirigacha amal qiladi. Transfermarkt internet portaliga ko‘ra futbolchining taxminiy narxi 27 million yevroni tashkil qiladi.