"Фиорентина" "Атланта Юнайтед" ва Аргентинанинг ҳужумкор ярим ҳимоячиси Тьяго Альмада билан шартнома имзоламоқчи. Бу ҳақда Football Italia хабар бермоқда.
Манбага кўра, "бинафшаранглилар" вакиллари аллақачон Америка клуби билан боғланиб, 22 ёшли футболчининг эҳтимолий трансферини муҳокама қилишган. "Атланта" ҳужумкор футболчиси учун тахминан 25 миллион евро сўради, бироқ "Фиорентина" ҳали бундай маблағдан воз кечишга тайёр эмас. Қайд этилишича, футболчининг ўзи А Серияга ўтишга қизиқмоқда.
Альмада 2022 йилдан бери "Атланта Юнайтед"да ўйнаб келмоқда. Ўтган мавсумда ярим ҳимоячи барча турнирларда 35 та ўйин ўтказиб, 13 та гол ва 19 та голли узатмани амалга оширган. Футболчининг Америка клуби билан шартномаси 2025 йил охиригача амал қилади. Transfermarkt интернет порталига кўра футболчининг тахминий нархи 27 миллион еврони ташкил қилади.
