Qatar terma jamoasi bosh murabbiyi Tintin Markes Lopes bugun matbuot anjumanida ishtirok etib, O‘zbekistonga qarshi bo‘ladigan o‘yin oldidan o‘z fikrlari bilan o‘rtoqlashdi.

"Bizda salbiy bosim yo‘q. Aksincha, stadionning muxlislar bilan to‘lishi bizga motivasiya beradi va biz g‘alaba qozonishni istaymiz. Muhim o‘yinda g‘alaba qozonishimiz uchun bu holat bizga ijobiy bosim beradi.

Terma jamoaning muhiti a’lo darajada, yaxshi kayfiyat bilan mashg‘ulotlarda ishtirok etyapmiz. Barchamiz aka-uka bo‘lib istiqomat qilyapmiz.

O‘zbekiston terma jamoasi musobaqa biz duch keladigan eng murakkab raqib hisoblanadi. Men bu jamoa futbolchilarini yaxshi bilaman. Chunki avvalroq ular bilan Osiyo chempionlar ligasi bahsida to‘qnash kelganman", — dedi ispaniyalik mutaxassis.