Osiyo kubogi yarim final o‘yinlariga tayinlangan hakamlar ro‘yxati e’lon qilindi.

Bugun bo‘lib o‘tadigan Iordaniya - Saudiya Arabistoni o‘yinida BAAdan tashrif buyurgan hakamlar ishlaydi. Bosh hakam — Muhammad Abdulla Hasan. Xitoy referilar zaxira hakami vazifasida ishlasa, VARda BAA va Yaponiya vakili o‘tiradi.

Ertaga o‘tkaziladigan Eron - Qatar o‘yiniga kuvaytlik bosh hakam Ahmad al-Aliy tayinlangan. Shuningdek, o‘yin davomida Malayziya, Yaponiya, Xitoy, Tailand va Xitoy vakillari turli vazifalarni bajarishadi.

Ochig‘i, ayni paytda Qatardagi turnirda qaysi hakamlar qolgani va qaysi hakamlar ortga qaytarib yuborilganidan xabarim yo‘q. Ko‘p ehtimol bilan jamoasi yarim finalgacha yetib kelgan mamlakat hakamlariga "ruxsat" berib yuborilgan.

Shunchaki taxmin qilaman, Ilgiz Tantashev boshchiligadagi o‘zbekistonlik hakamlar FINAL o‘yinini boshqarishadi.

Bosh hakam — Ilgiz Tantashev (O‘zbekiston)
Yordamchi hakamlar — Timur Gaynullin (O‘zbekiston) va Andrey Sapenko (O‘zbekiston)

Odatda, mezbon jamoa finalga chiqmasa, ushbu yurt hakami finalda zaxira referisi vazifasini bajaradi.

Tantashev Osiyo kubogi-2023ning 3 ta o‘yinida bosh hakam, yana 3 ta bahsida zaxira hakami vazifasini bajardi. Xususan, hakamlarimiz nimchorak final bosqichidan o‘rin olgan Saudiya Arabistoni va Janubiy Koreya o‘rtasidagi markaziy o‘yinni boshqarib borishdi.