Osiyo Chempionlar ligasi, nimchorak finali birinchi o‘yinidan o‘rin olgan “Navbahor” – “Al-Ittihod” (0:0) jamoalari o‘rtasidagi o‘yindan keyingi matbuot anjumanining ikkinchi qismida namanganliklar bosh murabbiyi Samvel Babayan ishtirok etib, OAV xodimlarining savollariga javob berdi.

- Bugungi Osiyo Chempionlar ligasi “pley-off” o‘yini “Navbahor” uchun juda muhim edi. Asosiy muammoyimiz - hali jamoaning yaxshi formada emasligi. Shunday bo‘lsa-da, yigitlar juda tashabbuskor va zich futbol namoyish etdi. Baribir ayrim futbolchilar mashg‘ulotlarni bir hafta oldin boshlashgan. Mazkur jihat biroz pand berdi, deya olaman. Natijaga kelsak, Osiyoning kuchli jamoalaridan biriga qarshi o‘ynadik. Shu tufayli biz ko‘proq to‘psiz harakat qildik. Biz ham ko‘p vaziyatlar yaratdik. Afsuski, ularni yakunlashda muammolar bo‘ldi. 
- Ibrohim Yo‘ldoshev jarohat olganidan so‘ng, Yovan Jokichni himoyaga qo‘ydingiz. Bu menimcha, ish berdi. Balki yangi mavsumdan Jokichni yangi pozisiyada ko‘rarmiz? 
- Chindan ham Yo‘ldoshevda jarohat bor edi. Tarkibimizga kelsak, top futbolchilar soni baribir cheklangan. Shu sababli, Yovanni bu pozisiyada sinadik va u bugun himoyada o‘ta ishonchli va sifatli o‘yin ko‘rsatdi. Hozir Jokich chempionatimizdagi eng sifatli futbolchilardan biri. Ishonamanki, u istalgan nuqtada harakat qila oladi. 

- Farrux Sayfiyev va Odil Hamrobekov Osiyo kubogi-23 musobaqasi  tufayli jamoa mashg‘ulotlarida ko‘p ishtirok etishmadi. Biroq ular “Navbahor” o‘yiniga  juda tez moslashib ketishibdi. Qolganlarda adaptasiya jarayoni qanday? Shuningdek, transfer oynasi yakunlanguniga qadar yana yangilik ko‘rishimiz mumkinmi?

- Juda ham yaxshi savol. Rostdan ham ular juda tez moslashib ketishdi. Qolganlarga kelsak, Ruslanni ham alohida e’tirof etish kerak. U ham yaxshi o‘yin o‘tkazdi va raqib darvozasi oldida ko‘p xavf yaratdi. Eng muhimi, u jamoaga hujum tashkil qilishda katta yordam beradi. Transferlar haqida gapirsam, hali oyna ochiq. Hozirgi kunda bizda yetarlicha futbolchilar bor. Yana bilmadim. Buni muhokama qilib ko‘ramiz. 
- Durang natija sabablari va javob uchrashuvi haqida gapirsangiz?
- Bugun yutishimiz mumkin edi. Bu qadar qiyin uchrashuv bo‘lishiga sabab - bu raqib faktori. Ularning tarkibida ikki nafar Yevropa Chempionlar ligasida to‘p tepgan futbolchi bor. Biz bu mavsum hisobidan ilk rasmiy o‘yinimizni o‘tkazdik. Javob bahsiga kelsak, biz kurashamiz va maksimal darajada imkoniyatlarimizdan foydalanamiz.