Yangi mavsumga Turkiyada puxta hozirlik ko‘rayotgan «Neftchi» bugun yana bir bor «Sochi» klubi bilan nazorat o‘yinini o‘tkazdi.

Birinchi bo‘lim avvalida vakillarimiz faol o‘ynab, 5-daqiqada Jasur Jaloliddinovning mahorati va kuchli zarbasi evaziga hisobni ochishga muvaffaq bo‘ldilar — 1:0. Kiritilgan goldan so‘ng o‘yin surati biroz tenglashdi va har ikkala jamoada ham gol urish uchun imkoniyatlar yuzaga keldi. Lekin, tanaffusga qadar hisob o‘zgarmay, minimal ustunlik bilan vakillarimiz maydonni tark etishdi.

Ikkinchi bo‘limda murabbiylarimiz tarkibni deyarli to‘laligicha almashtirishga qaror qabul qilib, zaxiradagi o‘yinchilarni maydonga tushirdilar. O‘yinga qo‘shilgan futbolchilar ancha faollik bilan harakatlanib, bir necha bor raqiblar darvozasiga xavf solishga urinishdi. Ammo, bellashuvning 61-daqiqasida burchak zarbasiga ega chiqqan rossiyaliklar javob to‘pini kiritishdi — 1:1.

Shundan so‘ng futbolchilarimiz o‘yinida jonlanish yuzaga keldi va uchrashuvning 80-daqiqasida o‘ng qanotdan oshirilgan aniq uzatmaga Behruz Oblaqulov to‘pni to‘xtatmasdan kuchli zarba bilan «Sochi» darvozasiga chiroyli gol kiritdi — 2:1.

Hisobni o‘zgartirish navbati endi rossiyaliklarga o‘tganday bo‘ldi va ular tez-tez qarshi hujumga zo‘r berdilar. Bellashuvning 84-daqiqasida himoyachilarimizdan o‘zib ketgan «Sochi» vakili darvozamizni ikkinchi bor ishg‘ol etib, hisobni 2:2 ko‘rinishiga keltirdi.

Uchrashuvning qolgan daqiqalari o‘zgarishsiz o‘tdi va o‘yin durang 2:2 natijasi bilan yakun topdi.

Xalqaro nazorat uchrashuvi
«Neftchi» – «Sochi» 2:2
Gol: Jasur Jaloliddinov 5′(1:0), G. Saul 62′(1:1), Bexruz Obloqulov 80′(2:1), K Zaika 85′(2:2)
«Neftchi»: Botirali Ergashev, Zoir Juraboyev, Anvar G‘ofurov, Mirzoxid G‘ofurov, Abbos G‘ulomov, Javoxir Qaxramonov, Xusayn Norchayev, Muxsin Ubaydullayev, Jasur Jaloliddinov, Katalin Karp, Mixay Roman
Zaxiradan qo‘shilganlar: Bilolxon Toshmirzayev, Diyor Turopov, Doniyor Valiyev, G‘ulom-Haydar Gulamov, Sanjar Qodirqulov, Jaloliddin Jumaboyev, Shohruz Norxonov, Manuchehr Safarov, Bexruz Oblaqulov, Xurshid Muxtorov

«Neftchi» matbuot xizmati