«Inter Mayami» hujumchisi Lionel Messi Xitoyning Weibo ijtimoiy tarmog‘i orqali videomurojaat tayyorlab, nima uchun Gonkongga qarshi o‘rtoqlik o‘yinida ishtirok etmaganiga izoh berdi.

«Gonkongga qarshi o‘yindan keyin men ko‘p narsa o‘qidim va eshitdim. Men bu video orqali aslida nima bo‘lganini tushuntirib bermoqchiman.

Odamlar meni siyosiy va boshqa ko‘p sabablar tufayli maydonga tushmadi, deya gapirishayotganini eshitdim, ammo bu haqiqatga mos kelmaydi. Agar bunday bo‘lganida, men Yaponiya va Xitoyga bormagan bo‘lardim. Faoliyatimning ilk davridan boshlab menda Xitoy bilan yaqin va o‘ziga xos munosabatlar bo‘lgan.

Men matbuot anjumanida aytib o‘tganimdek, mushagimda og‘riq his qildim. Shuning uchun ham Saudiya Arabistonidagi birinchi o‘yinda ishtirok eta olmadim. O‘shanda og‘riqni his qilgandim. Ikkinchi o‘yinda maydonga tushdim, ammo og‘riq kuchayib ketdi. Gonkongga qarshi o‘yindan bir kun avval esa mashg‘ulotga kelganlarni quvontirish uchun bor kuchimni berib harakat qildim.

Oradan bir necha kun o‘tib o‘zimni yaxshi his etdim. Shuning uchun mavsumga jismoniy jihatdan yaxshi tayyorgarlik ko‘rish maqsadida Yaponiyada bahsda o‘ynadim. Formaga kirib olishim kerak edi», – dedi Messi.