O‘zbekiston Superligasi yangi mavsumining 1-turida jami 20 ta gol darvozalarga kiritildi.

Kiritilgan 20 ta goldan bor-yo‘g‘i 2 tasi o‘zbekistonlik hujumchilar hisobiga yozildi. Shu ikkitagina golning ham bittasi penaltidan Shahzod Ubaydullayev tomonidan urilgan bo‘lsa, ikkinchi golga tajribali Temurxo‘ja Abduholiqov (32 yosh) mualliflik qildi. Gollarning teng yarmi legionerlar hissasiga to‘g‘ri keldi. Jumladan, legionerlardan Tabatadze "(Neftchi", 2 ta), Effiong ("Neftchi", 2 ta), Cheran ("Paxtakor", 2 ta), Joyel Kojo ("Dinamo"), Marushich ("Nasaf"), Kuxianidze ("Qizilqum"), Doriyev ("So‘g‘diyona") gol muallifi bo‘lishdi.

O‘zbekistonda hujumchilar muammosi bu yaqinda paydo bo‘lib qolgan muammo emas. Uzoqqa bormasdan, o‘tgan mavsumdagi to‘purarlar jadvaliga nazar tashlasak, yuqori pog‘onalarda o‘zbekistonlik hujumchilarni uchratmaysiz. To‘purarlar jadvalining 4-o‘rinidan joy olishgan G‘iyosov va Urunov yarim himoyachilar bo‘lib, gollarining katta qismini penaltidan kiritishgan edi.