Ўзбекистон Суперлигаси янги мавсумининг 1-турида жами 20 та гол дарвозаларга киритилди.

Киритилган 20 та голдан бор-йўғи 2 таси ўзбекистонлик ҳужумчилар ҳисобига ёзилди. Шу иккитагина голнинг ҳам биттаси пенальтидан Шаҳзод Убайдуллаев томонидан урилган бўлса, иккинчи голга тажрибали Темурхўжа Абдуҳолиқов (32 ёш) муаллифлик қилди. Голларнинг тенг ярми легионерлар ҳиссасига тўғри келди. Жумладан, легионерлардан Табатадзе "(Нефтчи", 2 та), Эффионг ("Нефтчи", 2 та), Черан ("Пахтакор", 2 та), Жоел Кожо ("Динамо"), Марушич ("Насаф"), Кухианидзе ("Қизилқум"), Дориев ("Сўғдиёна") гол муаллифи бўлишди.

Ўзбекистонда ҳужумчилар муаммоси бу яқинда пайдо бўлиб қолган муаммо эмас. Узоққа бормасдан, ўтган мавсумдаги тўпурарлар жадвалига назар ташласак, юқори поғоналарда ўзбекистонлик ҳужумчиларни учратмайсиз. Тўпурарлар жадвалининг 4-ўринидан жой олишган Ғиёсов ва Урунов ярим ҳимоячилар бўлиб, голларининг катта қисмини пенальтидан киритишган эди.