Erling Xoland yana bir dabdabali avtomobil sohibiga aylanadi.

«Manchester Siti» hujumchisi bolalik do‘sti, HiTecVision investisiya kompaniyasi asoschisi Ole Ertvaag bilan birga Mercedes AMG One superkarini sotib olishga qaror qildi. Ushbu avtomobilning tan bahosi 2,5 million yevroga teng. Lekin soliq to‘lovlari hisobga olinsa, dabdabali «toychoq» yanada qimmat tushadi - 3,13 million yevro.

Mercedes AMG One rusumi cheklangan miqdorda ishlab chiqarilgan. Aniqroq aytsak, yer yuzida atigi 275 dona shunday atomobil bor. Norvegiyalik to‘purarning yangi xaridi naq 5ta «Formula 1» bolidi dvigateliga ega. Shundan kelib chiqsak, Mercedes AMG One soatiga 352 km. tezlikda «uchish» imkoniyatini hosil qilgan. Yana bir tasnif: superkar atigi 7 soniya ichida soatiga 200 km. tezlik olishi mumkin, 15,6 soniyada esa bu ko‘rsatkich 300 kilometrga oshadi.

Aytgancha, Erling Xoland bunga qadar asosan Mercedes AMG GLE rusumidan foydalangan, bu mashanining bahosi - 105 ming yevro. Norvegiyalik «yirtqich» avtosalonida yana Rolls Royce Cellinan (350 ming yevro), Audi RC6 Avant (140 ming yevro) va Range Rover Sport (140 ming yevro) avtomobillari ham bor.

Futbol olamida Lionel Messi va Krishtianu Ronaldu o‘zaro raqobatlashmaydigan jihat bormi!? 2016 yili tarixiy Ferrari 335 S Spider Scaglietti avtomobili Parij auksionida 30 mln. dollarga sotilgandi. Ya’ni Lionel Messi eng qimmatbaho Ferrari egasiga aylangan edi. O‘shanda Krishtianu ham bu avtomobilga qiziqqan edi.