O‘tgan seshanba oqshomida namoyish etilgan YECHL gigantlari o‘rtasidagi bellashuvdan keyin xorijlik kasbdoshimiz butun e’tiborini Chempionshipdagi «Koventri» - «Ipsvich» uchrashuviga qaratdi.

To‘g‘ri, u APL jamoalari o‘rtasidagi qarama-qarshilik emas, lekin mehmon jamoa uchun tikilgan mablag‘ YECHL ajratgan mukofot pulidan ham ko‘p edi.

O‘yinning asosiy vaqtida «Ipsvich» 2:1 hisobida oldinda edi. 12 daqiqalik qo‘shimcha vaqtda o‘z muxlislari qarshisida taslim bo‘lishni istamagan va avvalroq «MYU»ga qarshi kambekni (Angliya Kubogi) namoyish etgan mezbonlar to‘liq tarkib bilan hujumga otlanishdi. Lekin mehmonlar ishonchli himoyalanib, muhim g‘alabani saqlab qolishdi. G‘alaba elita yo‘llanmasi yo‘lidagi hal qiluvchi qadam bo‘ldi. Chunki oxirgi turda APL yo‘llanmasini qo‘lga kiritishi uchun «Ipsvich»ga o‘z uyida autsayder «Xaddersfild»dan yengilmasligi kifoya qilardi.

Qizig‘i shundaki, 2 yil avval «Ipsvich» mavsumni 1-divizionda o‘tkazgan, keyingi mavsumda 2-o‘rin bilan Chempionshipga ko‘tarilgandi. Tarkibning umumiy qiymati bo‘yicha 16-o‘rinda bo‘lgan 50 mln.li 4 baravar qimmatroq tarkibli «Lester» va «Lids»ga munosib raqobat ko‘rsatishini hech kim tasavvur qila olmagandi. Biroq Rojdestvo bayramiga «traktorchilar» «tulkilar»dan keyingi 2-pog‘onada yetib keldilar, 3-o‘rindagi «Lids» 7 ochkoga ortda qolgandi. Ikkinchi davrada jamoa o‘yinida pasayish yuz berdi, lekin 46 uchrashuvli marafonda toplar ham barqaror to‘p sura olmadilar: hatto yetakchi «Lester»ning APLga to‘g‘ridan-to‘g‘ri yo‘l olishi shubha ostida qolgan davrlar ham kuzatildi. «Lids»ning kamtarin «KPR»ga imkoniyatni boy berishi (0:4) «Ipsvich»ga juda qo‘l keldi - jamoa 2-o‘rinni saqlab qoldi. «Lids», «Sautgempton», «Norvich» va «Vest Bromvich» pley-off bosqichida o‘z omadlarini sinab ko‘radigan bo‘lishdi.

«Ipsvich»ning zafari: hech kim takrorlay olmaydigan rekord!

Jamoaning eng yorqin yutuqlari aynan shu klubda yulduzlarga aylangan 2 nafar murabbiy bilan bog‘liq. Alf Remzi 1962 yilda yagona chempionlikni hadya etgandi. Lekin ana shu tarixiy zafar oliy diviziondagi debyut mavsumida qayd etilgan, boshqa birorta jamoa bunga erisha olmagan. Keyin Bobbi Robson 13 yil «traktorchilar»ni boshqardi. Uning davrida jamoa chempionatda 2 marta kumush medallarni qo‘lga kiritgan, Angliya va UYEFA Kuboklarining sohibi bo‘lgandi. bu 2 mutaxassisga «Portmen roud»da yodgorlik o‘rnatilgan.

«Ipsvich» 90-yillar avvalida ikki mavsumni elitada o‘tkazgan, keyin asrlar almashuvi davrida. 2001/02 yillar mavsumida jamoa Moskva «Torpedo»sini UYEFA Kubogi turnirida yenggandi.

Qolgan mavsumlarni jamoa Chempionshipda o‘tkazib, 2019 yilda 1-divizionga tushib ketdi. Bu 1957 yildan beri qayd etilmayotgan omadsizlik edi.

2021 yil bahorida AQSHning «Gamechanger 20» kompaniyasi «Ipsvich»ni 40 mln. funtga xarid qilgach, boshqaruv tizgini Chempionshipdagi ko‘pgina jamoalarda tajriba to‘plagan Mark Eshtonga o‘tdi. Shuningdek, dekabrda bosh murabbiy ham o‘zgardi - omadsizlik tufayli iste’foga chiqarilgan Pol Kuk o‘rnini biron-bir jamoada bosh murabbiy maqomida ishlamagan 35 yoshli Kiran Makkenna egalladi. O‘sha kundan boshlab shimoliy irlandiyalik mutaxassis ingliz professional futbolidagi barcha murabbiylarga nisbatan ko‘proq ochko jamg‘ardi. Xo‘sh, Makkenna kim?

«Ipsvich» murabbiyi - 22 yoshda futbolchilik  faoliyatini yakunlagan, Mourinyo bilan ishlagan

Kiran jarohat tufayli maydonni barvaqt tark etishga majbur bo‘lgandi. O‘sha davrda u «Tottenxem» tarkibida bo‘lgan, lekin biror marta asosiy tarkibda to‘p surmagan. Keyin u klub tizimida turli yosh toifasidagi jamoalarni boshqardi, 2016 yilda «MYU»ning yoshlar jamoasini qabul qildi. 2018/19 yillar mavsumi arafasida Makkenna va Maykl Kerrik Mourinyo murabbiylar shtabidan joy olishdi. Keyin esa Rangnik va Sulsherga yordam berdi. 2021 yil oxirida nihoyat, «Ipsvich»dan taklif oldi. Bu yosh mutaxassisning bosh murabbiyi maqomidagi debyuti edi.

Aftidan, «Tottenxem» va «MYU» akademiyalarida faoliyat aynan Kirandagi murabbiylik xislatiga sayqal bergandek: u shunchaki, shogirdlarining salohiyatini yuzaga chiqarish bilan qanoatlanmaydi, yanada samaraliroq to‘p surishni o‘rgatadi.

«Ipsvich»ning chap qanot himoyachisi Leyf Devis - Chempionshipning eng yaxshi assis­tenti (18ta samarali uzatma) o‘zining sermahsul faoliyati uchun Makkennadan minnatdor. Joriy mavsumda himoyachi 2ta gol va 18ta assistni o‘z hisobiga yozib qo‘ydi. O‘tgan yil yozida «Chelsi»dan o‘tgan va ijara asosida to‘p surayotgan 20 yoshli hujumchi Omari Xatchinsonda ham sezilarli o‘sish kuzatilmoqda.

Quvnoq futbol

«Ipsvich»da ish boshlagan Makkenna stadion yaqinidagi mehmonxonaga ko‘chib o‘tdi. Avvalo, u klub rahbariyatidan qimmatbaho transferlarni emas, mavjud sharoitni yaxshilashni so‘radi. Uning iltimosiga binoan, mashg‘ulot bazasida 2ta zamonaviy maydon paydo bo‘ldi, amaldagi stadion maydoni 2,5 mln. funt evaziga sifatli gazonga ega bo‘ldi.

Kiran esa sevimli 4-2-3-1 sxemasiga mos tarkibni shakllantirdi va asosiy e’tiborni jismoniy tayyorgarlikka q qaratdi. Uning dastlabki to‘liq mavsumida «Ipsvich» 101ta gol urib (to‘plar nisbati +66), liganing eng maftunkor jamoalari safiga ko‘tarildi. Taqqoslaydigan bo‘lsak, turnirda g‘olib chiqqan «Plimut»ning ko‘rsatkichi 82ta gol (to‘plar nisbati +35).

Xursandchilik Chempionshipda davom etdi. «Ipsvich» ichki chempionatda eng ko‘p gol urgan bo‘lsada, o‘tkazib yuborgan gollari ham ayrim autsayderlar ko‘rsatkichidan yomonroq bo‘ldi. Lekin ruhiy barqarorlik bo‘yicha, «traktorchilar»ga havas qilsa arziydi: «Sautgempton»ni 3:2 hisobida taslim etgan g‘alaba goli 97-daqiqada, «Bristol» ustidan erishilgan shunday hisobdagi zafar 89-, «Roterxem»ni 4:3 hisobida sindirgan hal qiluvchi gol 95-daqiqada amalga oshirilgan. Qizig‘i, o‘shanda raqib jamoa 94-daqiqada muvozanatni tiklagan, lekin yakunda mag‘lubiyatni tan olgandi.

Ipsvich qayerda joylashgan, nima uchun jamoa nomi «traktorchilar»?

Ipsvich - Angliyaning sharqida joylashgan Saffolk grafligi poytaxti, Londondan 2 soatlik yo‘l uzoqligida. Shaharda 130 mingga yaqin aholi istiqomat qiladi. Graflikda bepoyon dalalar va yaylovlar ko‘p. Fuqarolar qishloq xo‘jaligida mehnat qiladilar. Shu sababli bosh­qa jamoalar muxlislari jamoaga «traktorchilar» laqabini berishgan. Jamoa esa taxallusni mamnuniyat bilan qabul qilgan.

Tabiiyki, futbol bu jajji shaharni tubdan o‘zgartirib yubordi. O‘yin kunlarida qahvaxona va barlar mehmonlar bilan to‘lib ketadi, stadionga kirish ham oson emas. Yangi mavsum abonementlari sotib tugatilgan aprel oyidayoq ma’lum bo‘ldi.

Angliyadagi an’anaga ko‘ra, «Ipsvich» bilan muvaffaqiyat qozongan murabbiyga milliy terma jamoa boshqaruvi topshiriladi. O‘z vaqtida bunday sharafga sazovor bo‘lgan Alf Remzi «Uch sherlar»ni jahon chempionligiga olib chiqqan, Bobbi Robson esa yarim finalga yetib borgani haqida yuqorida zikr etildi. Demak, agar Kiran Makkenna ham APLda muvaffaqiyatga erisha olsa, terma jamoa uchun sezilarli madad, ingliz futboli uchun chinakam mo‘’jiza bo‘ladi.

S.RAHMONOV tayyorladi