Parij-2024 saralash sikli boks bo‘yicha O‘zbekiston ayollar terma jamoasi uchun omadli o‘tdi, deyish mumkin. Zero, qizlarimiz jamoamiz tarixida ilk bor 4 ta yo‘llanma qo‘lga kiritishga muvaffaq bo‘ldilar. Xo‘sh, endi 4 yillikning eng nufuzli musobaqasiga tayyorgarlik qanday kechadi? Bu haqida ayollar terma jamoasi bosh murabbiyi Elshod Rasulovning fikrlari bilan bo‘lishamiz.

– Ma’lumki, joriy Olimpiya o‘yinlarida ayollar o‘rtasida 6 ta vazn toifasida bahslar o‘tkaziladi. Terma jamoamiz 4 ta vaznda lisenziya qo‘lga kiritdi. Ochig‘i, maksimal darajada yo‘llanma olishga harakat qilgan edik. Ammo hayotda barchasi biz xohlagandek bo‘lmaydi. Baribir, saralash siklidan ko‘ngil to‘ldi, deyish mumkin. Bu biz uchun katta yutuq. Nega deganda, ayollar boksida kuchli sanalgan AQSH va Hindiston kabi jamoalar ham 4 tadan lisenziyaga ega chiqdi. Qo‘shni Qozog‘iston hamda Buyuk Britaniya jamoasi hisobida 3 ta yo‘llanma bor. Shu nuqtayi nazardan, natijamizdan ko‘nglim to‘ldi.

– Hozirgi kunda sportchilarning holati qanday?
– Nafaqat lisenziatlarimiz, balki terma jamoadagi barcha bokschilarimizning ahvoli yaxshi. Ertaga Rossiyaning Qozon shahrida start oladigan BRIKS o‘yinlarida 3 nafar litsenziatimiz Sabina Boboqulova, Nigina O‘ktamova hamda Sitora Turdibekova ishtirok etishadi. Bu orqali ularning tayyorgarligini ko‘zdan kechirish reja qilingan.

– Tayyorgarlik doirasida xorij yig‘iniyam ko‘zda tutilganmi?
– Yo‘q, xalqaro yig‘in rejaga kiritilmagan. BRIKS o‘yinlaridan keyin Yangioboddagi terma jamoa bazasida Olimpiya o‘yinlariga tayyorgarlikni davom ettiramiz. Rejamizga ko‘ra, oldinda 2 bosqichli o‘quv-mashg‘ulot yig‘inidan so‘ng jamoamiz bilan Parijga yo‘l olamiz.

– Bo‘lajak Olimpiadadan nimalar kutyapsiz?
– Olimpiadaning uch karra ishtirokchisi sifatida ayta olamanki, u yerda omad ko‘p narsani hal qiladi. Lekin men har bir shogirdimga ishonaman. Ular murosasiz janglarda bor imkoniyatlarini ishga solib, o‘zbek ayollar boksida yangi sahifa ochishga harakat qilishadi.