Muxlislar Krishtianu Ronaldu jarima zarbasini amalga oshirishdan oldin o‘ziga nima deyishini aniqlashdi.

Chunonchi, portugaliyalik yulduz Yevro-2024 startidan oldin Irlandiya termasiga qarshi kechgan o‘rtoqlik o‘yinida jarima nuqtasidan zarba berish chog‘i yana o‘z-o‘ziga nimalarnidir pichirladi va yakunda darvoza ustunini titratdi.

Tabiiyki, Krishtianuning personal va sinch­kov muxlislari uning jarima zarbasi ijrosi oldidan o‘ziga pichirlaganini payqamasdan qolmadilar. Shu tariqa ijtimoiy tarmoqlarda 39 yoshli futbolchi darvoza ustunini mo‘ljalga olishga qadar o‘z-o‘zi bilan nima haqda gaplashganini aniqlash bo‘yicha muhokamalar boshlanib ketdi. Xususan, X (oldingi «Tvitter») foydalanuvchilarining aniqlashlaricha, «Al-Nasr»da o‘ynash asnosida ham yuksak mavqeni tushirmagan hujumchi zarbaga chog‘langan vaqt o‘zini alohida ruhlantirgan: «Gol ur, bu sen uchun odatiy hol». Ha, Ronaldu shunday yigit - o‘ziga qattiq ishonadi, buni butun vujudiga singdirishni ham biladi. Ma’lumot uchun, faoliyati davomida jarima zarbalaridan jami 63ta gol urgan Krish futbol tarixidagi eng kuchli standart ijrochilari qatorida bormoqda.

Aytgancha, Ronaldu irlandlar bilan o‘yinda yana bir jahon rekordini o‘z nomiga rasmiylashtirdi. Xalqaro futbol tarixi va statistikasi federasiyasi hisob-kitob­lariga ko‘ra, portugaliyalik yulduzning professonal darajadagi o‘yinlari soni 1226taga yetdi. U shu tariqa gvardiyachilar ro‘yxatida Braziliya milliy jamoasi sobiq darvozaboni Rojerio Senini ortda qoldirdi. Ronaldu hisobidagi o‘yinlar taqsimoti: milliy chempionatlar (Portugaliya, Ang­liya, Ispaniya, Italiya va Saudiya Arabis­toni) - 698ta, milliy kubok/superkuboklar - 101ta, klublar miqyosida xalqaro turnirlar - 220ta, terma jamoa - 207ta.

Yana bir fakt shuki, Krishtianu faoliyatidagi 900-golga tobora yaqinlashmoqda. Irlandiya termasiga qarshi «o‘rtoqlik»da «dubl»ga erishgan 39 yoshli futbolchining jami gollari soni 895taga yetdi. Shundan 130tasi Portugaliya terma jamoasi libosida urilgan. Oddiy aytganda, Ronaldu endilikda portugallar uchun urgan har bir goli bilan bu borada o‘ziga tegishli jahon rekordini yangilamoqda. Ma’lumot uchun, Krish yetakchiligidagi Portugaliya milliy jamoasi Yevro-2024da muddatidan avval pley-off bosqichiga chiqdi…