FIFA doirasida Markaziy Osiyoda ilk bor o‘tkaziladigan turnir — FIFA Futsal World Cup 2024™ musobaqasi yangi va muhim bosqichni qarshiladi. Fransiyada joylashgan tashkilot ofisida mundialning kubogi mezbon mamlakat — O‘zbekistonga topshirildi. Bu haqda FIFA rasmiy sayti xabar berdi.

Tadbirda FIFA Prezidenti Janni Infantino, O‘zbekiston Respublikasi Sport vaziri Adham Ikramov, Osiyo Olimpiya kengashi vise-prezidenti Otabek Umarov, O‘FA birinchi vise-prezidenti Ravshan Irmatov hamda MOQ bosh kotibi Oybek Kasimov ishtirok etdi.

10-bor tashkil etilayotgan mundialda jami yigirma to‘rtta jamoa ishtirok etadi. Afg‘oniston, Tojikiston, Yangi Zelandiya va Fransiya turnirda debyut qilsa, Portugaliya esa chempionlik unvonini himoya qilishga harakat qiladi. Turnir 2024 yilning 14 sentyabridan 6 oktyabriga qadar O‘zbekistonning uch shahrida — Toshkent, Andijon va Buxoroda bo‘lib o‘tadi. Musobaqaning qur’a tashlash marosimi 2024 yil 26 mayda YUNESKOning Jahon merosi ro‘yxatiga kiritilgan Samarqandning Registon maydonida bo‘lib o‘tdi.

“Men Parijdagi ofisimizda rasmiy kubokni O‘zbekiston sport vaziri Adham Ikromov va O‘zbekiston futbol assosiasiyasi birinchi vise-prezidenti Ravshan Irmatovga topshirganimda muhim bir bosqichni bosib o‘tdik. Ushbu tarixiy musobaqaga tayyorgarlik ko‘rishdagi ulkan ishlar uchun minnatdorchilik bildirdim va omad tiladim. May oyida Samarqandda o‘tkazilgan qur’a tashlash marosimi O‘zbekistondan nimalarni kutishimiz mumkinligini ko‘rsatib berdi. Men ushbu mamlakatdan ajoyib va go‘zal turnir mezbonligini kutmoqdaman”, dedi FIFA Prezidenti Janni Infantino.

Uchrashuv davomida O‘zbekiston delegasiyasi FIFA ofisida joylashgan muzey bilan ham tanishdilar. Muzeyda Ravshan Irmatovning hakamlik davridagi eksponat ham namoyish etildi.

“Parijda joylashgan ofisimizning muzeyiga sayohat qilish va futbolning buyuk tarixini ifodalovchi yodgorliklarni, shu jumladan Ravshan Irmatovning hakamlik davridan qolgan eksponatni ko‘rish juda yoqimli bo‘ldi, deya qayd etgan FIFA prezidenti Janni Infantino.