O‘zbekiston milliy terma jamoasi yordamchi murabbiyi Vlado Radmanovich va jamoamiz sardori Eldor Shomurodov Eronga qarshi o‘yindan so‘ng matbuot anjumanida ishtirok etdi.

Vlado Radmanovich:
— Bugungi o‘yin haqida
Ushbu o‘yin qiyin bo‘lishini kutgandik, chunki raqibimiz ham Osiyoda o‘z o‘rniga ega jamoalardan. Bugun bizda yaxshi imkoniyatlar ham bo‘ldi. Bugungi o‘yinga tashrif buyurgan muxlislar va OAVga o‘z minnatdorchiligimni bildiraman. Biz o‘yindan o‘yinga kuchayib borishni maqsad qilganmiz. Oldimizda yanada jiddiy o‘yinlar bizni kutib turibdi. Navbatdagi o‘yinimiz BAAga qarshi bo‘lib o‘tadi va muxlislarimizdan bizni qo‘llab-quvvatlashlarini so‘rab qolamiz.

Hakamlik haqida
— Bu mavzuda gapirishni istamayman. Chunki murabbiylar uchun hakamlar haqida gapirish noto‘g‘ri deb hisoblayman.

Jismoniy holat haqida
— Terma jamoada bu yo‘nalishda futbolchilar bilan ishlash uchun yetarlicha vaqt bo‘lmaydi, bu barcha terma jamoalarda uchrab turadigan muammo. Chunki biz ularni o‘yinga tayyorlashga 3 kun vaqtimiz bor edi. Biz asosan taktik va o‘yin qurish ustida ishlaymiz.

Oston dastlab o‘yinga tayyorligini aytgandi, biroq oxirgi mashg‘ulotdan keyin u og‘riq his qildi. Shu sababli bu darajadagi o‘yinda biz tavakkal qila olmasdik.

Eldor Shomurodov:
— Bugungi o‘yin haqida
Yomon o‘ynamadik, deb o‘ylayman. Bugun 2 ochko yo‘qotdik, lekin bu katta yo‘qotish deb o‘ylamayman. Albatta har bir ochkoning qadri biz uchun muhim. Bizning asosiy maqsadimiz JCHga chiqish. Keyingi o‘yinda g‘alaba qozonib, muhim 3 ochkoni qo‘lga kiritishga harakat qilamiz.

Raqib haqida
— Eronga qarshi o‘yin hech qachon oson bo‘lmaydi. 0:0 hisobida o‘ynab juda yomon natija ko‘rsatdik, deb o‘ylamayman. Har doimgidek, kuchli raqibga qarshi munosib kurash olib bordik.

Qizil kartochka haqida
— Birinchi navbatda, g‘alaba qozonishimiz uchun yaxshi imkoniyatimiz bor edi. Lekin aytganimdek, bugungi 1 ochko ham yomon natija emas. Keyingi o‘yinga jiddiy tayyorgarlik ko‘rishimiz kerak, hozir natijadan xafa bo‘lib o‘tirishga vaqtimiz yo‘q.