"Yuventus" so‘nggi daqiqalarda gol urib, Italiya chempionatidagi ilk mag‘lubiyatdan qutulib qoldi.
Tiago Motta shogirdlari 16-turda o‘z maydonida "Venesiya"ga 1:2 hisobida imkoniyatni boy berayotgan edi, biroq qo‘shib berilgan daqiqalarda Dushan Vlaxovichning penaltidan kiritgan goli evaziga mag‘lubiyatdan qutulib qolishga muvaffaq bo‘ldi.
Endilikda turinliklar chempionat boshlanganidan buyon 6 g‘alaba va 10 durangga erishgan.
Shu bilan birga, barcha turnirlardagi so‘nggi olti uchrashuvda turinliklar faqat bitta g‘alabaga erishgan – 11 dekabr kuni "Manchester Siti" (2:0). Qolganlarida "Yuventus" raqiblari bilan ochko bo‘lishib oldi.
17 dekabr kuni "byankonerilar" Italiya kubogi doirasida "Kalyari"ni qabul qiladi.
