Yaqinda darvozabon Eldor Adhamovning "Andijon" bilan shartnomasini uzaytirgani to‘g‘risida rasmiy xabar berib o‘tgandik.
28 yoshli posbon ortda qolgan mavsum, shartnomani uzaytirishi sababi va yangi mavsum rejalari xususida "Andijon" matbuot xizmatiga o‘z fikrlarini bildirdi:
- Avvalo, hammani muvaffaqiyatli o‘tgan mavsum bilan tabriklayman. Umumiy qilib gapiradigan bo‘lsam, fevralda Turkiya yig‘inida jarohat oldim. Natijada chempionatni jarohat bilan boshladim. Shu bois boshidagi uchrashuvlarni o‘tkazib yuborishga majbur bo‘ldim. May oyida umumiy guruhga qaytdim. Natijada asta-sekin umumiy guruh mashg‘ulotlariga qo‘shilib oldim.
Men uchun ham, jamoa uchun ham mavsum yaxshi o‘tdi. Bunga isbot sifatida tarixda ilk bor qo‘lga kiritilgan O‘zbekiston Kubogini aytishim mumkin. Superligada deyarli 8-o‘rinni oldik. Ikkita frontda o‘ynab turib bunday natija qayd etish juda qiyin. To‘g‘ri, biz bundan ham ko‘piga qodir edik. Lekin har doim o‘zimiz o‘ylagandek bo‘lavermaydi. To‘g‘ri, orada muvaffaqiyatsiz o‘yinlarimiz ham bo‘ldi. Ammo bu sport. Sportda har xil holatlar bo‘lib turadi. Bundan har kim har xil xulosa qiladi. Xudoga shukr, biz xarakter ko‘rsatib, vaziyatni o‘nglay oldik va biz uchun hammasi yaxshilik bilan tugadi. O‘zimizga kerakli natijani qayd eta oldik. Bunda jamoadagi har bir futbolchi va xodimning hissasi katta. Buning uchun barchaga rahmat.
Mavsum tugashiga ikkita tur qolganida o‘ylantirib qo‘yadigan taklif bo‘ldi. Lekin xuddi bu taklifni murabbiylar shtabi bilganidek, o‘zim bilan gaplashishdi. Mana, jamoam bilan muzokarani olib bordik va yakunda kelishdik. Kelasi yili "Andijon"ni ajoyib mavsum kutyapti. Osiyo Chempionlar ligasida debyutini o‘tkazadi va o‘zini ko‘rsatishga bo‘lgan ishtiyoqi juda kuchli. Bunday imkoniyatni qo‘ldan chiqarib yuborgim kelmadi.
Mavsum oxirlagan sari o‘zimni sport formamni yuqori darajasiga chiqib bordim. Kelasi yilga oldimga Superliga va OCHLda bundan-da munosib ishtirok etib, jamoamga hissa qo‘shish hamda katta marralarni zabt etish maqsadini qo‘ydim. Ko‘tarilish pog‘onalarimdan biri minimum terma jamoa darajasiga chiqish va uning tarkibiga kirish", - deydi Adhamov.
