Gruziyaning Tbilisi shahrida karate WKF bo‘yicha jahon reyting ballarini beruvchi “ A” ceriyasi tasnifida o‘tayotgan musobaqada o‘zbekistonlik sportchi sovrindorlar qatoridan joy egalladi.

87 ta davlatning ming nafardan ziyod karatechilari ishtirok etayotgan yilning ilk reyting turnirida bosh murabbiy Sulaymon Yusupov boshchiligidagi O‘zbekiston terma jamoasining 16 nafar a’zosi Vatanimiz sharafini himoya qilmoqda.

Ishtirokchi davlatlar ro‘yxatiga nazar tashlansa, turnirda Eron va Gruziya terma jamoalari 140 nafardan, Turkiya 105, Italiya 80, Qozog‘iston 46 nafar shuningdek, Rossiya, Yaponiya, Fransiya jamoalari 30 nafardan oshiq ishtirokchi bilan musobaqada ishtirok etmoqda.

Tbilisi tatamilarida kechayotgan turnirning ayollar o‘rtasida -55 kilogramm vazn toifasidagi bahslarda terma jamoamiz a’zosi Sevinch Rahimova karatening kumite yo‘nalishidagi janglarda bir qator tajribali raqiblarini yengib, final yo‘llanmasini qo‘lga kiritdi.

Sevinch Rahimova finalgacha Angliya, Eron, Turkiya kabi bir qator mamlakatlarning mahoratli karatechilaridan ustun keldi. Hamyurtimiz mag‘lub etgan sportchilar orasida jahon chempionati sovrindorlari, Yevropa va Osiyo qit’asi chempionlari bor ediki, bu, uning har bir bahsi final darajasida o‘tganligini anglatmoqda.

Murakkab kechgan final jangida hamyurtimiz yaponiyalik karatechi qizga ochkolar hisobida imkoniyatni boy berib, kumush medalni qo‘lga kiritdi.

Bugun, 12 yanvar kuni nufuzli musobaqaning so‘nggi kunida og‘ir vazndagi kumite bellashuvlari hamda kata bo‘yicha jamoalar o‘rtasidagi musobaqalar tashkil etiladi.