Toshkent shahridagi “Yunusobod“ sport majmuasida futzal bo‘yicha ayollar Osiyo chempionati saralash bosqichining “C” guruhidagi bahslar o‘z yakuniga yetdi.

Bugungi bahslarning dastlabkisida Avstraliya terma jamoasi 2:1 hisobida Filippin terma jamoasini mag‘lubiyatga uchratdi. 12 ochko jamg‘arib, birinchi o‘rinni egallagan holda Osiyo kubogiga yo‘l oldi. Filippin esa 7 ochko jamg‘argan holda uchinchi o‘rindan joy oldi. Bu orqali ular eng yaxshi natijaga ega bo‘lgan uchinchi o‘rin sohibi bo‘lib, qit’a birinchiligiga chiqdi.

Farrux Zokirov boshchiligidagi futzalchilarimiz esa saralashning so‘nggi o‘yinida Turkmaniston ustidan 6:2 hisobida g‘alaba qozondi. O‘yindagi gollarimizning 5 tasiga Maftuna Shoyimova, bittasiga Nilufar Qudratova mualliflik qildi.

Mazkur natija orqali terma jamoamiz ochkolarini 7 taga yetkazdi va gollar nisbatiga ko‘ra, ikkinchi o‘rinni egallab Osiyo kubogida ishtirok etish huquqini qo‘lga kiritdi. “S” guruhida Turkmaniston 3 ochko bilan, Quvayt esa ochkosiz 4-5-pog‘onalarda qayd etildi.

Ma’lumot o‘rnida: 2025 yilning 7–18 may kunlari Xitoyda futzal bo‘yicha Osiyo kubogi final bosqichi o‘tkaziladi.

Mazkur qit’a birinchiligida eng yaxshi natija ko‘rsatgan uch terma jamoa 21 noyabr - 7 dekarb kunlari Filippinda o‘tadigan jahon chempionatiga yo‘llanma oladi.