Тошкент шаҳридаги “Юнусобод“ спорт мажмуасида футзал бўйича аёллар Осиё чемпионати саралаш босқичининг “C” гуруҳидаги баҳслар ўз якунига етди.
Бугунги баҳсларнинг дастлабкисида Австралия терма жамоаси 2:1 ҳисобида Филиппин терма жамоасини мағлубиятга учратди. 12 очко жамғариб, биринчи ўринни эгаллаган ҳолда Осиё кубогига йўл олди. Филиппин эса 7 очко жамғарган ҳолда учинчи ўриндан жой олди. Бу орқали улар энг яхши натижага эга бўлган учинчи ўрин соҳиби бўлиб, қитъа биринчилигига чиқди.
Фаррух Зокиров бошчилигидаги футзалчиларимиз эса саралашнинг сўнгги ўйинида Туркманистон устидан 6:2 ҳисобида ғалаба қозонди. Ўйиндаги голларимизнинг 5 тасига Мафтуна Шойимова, биттасига Нилуфар Қудратова муаллифлик қилди.
Мазкур натижа орқали терма жамоамиз очколарини 7 тага етказди ва голлар нисбатига кўра, иккинчи ўринни эгаллаб Осиё кубогида иштирок этиш ҳуқуқини қўлга киритди. “С” гуруҳида Туркманистон 3 очко билан, Қувайт эса очкосиз 4-5-поғоналарда қайд этилди.
Маълумот ўрнида: 2025 йилнинг 7–18 май кунлари Хитойда футзал бўйича Осиё кубоги финал босқичи ўтказилади.
Мазкур қитъа биринчилигида энг яхши натижа кўрсатган уч терма жамоа 21 ноябрь - 7 декарбь кунлари Филиппинда ўтадиган жаҳон чемпионатига йўлланма олади.
