O‘zbekiston milliy terma jamoasi bosh murabbiyiga aylangan Timur Kapadze "oq bo‘rilar"ning Dubaydagi yig‘iniga yetib bordi. Murabbiy bu lavozimga tayinlanishi haqida o‘z fikrlarini bildirdi.
"Birinchi navbatda Srechko Katanesga sog‘lik tilaymiz. Hammamiz Srechkoning o‘zi jamoani oxirigacha olib borishini xohlar edik, ammo bu bizning qo‘limizda emas. Sog‘lik birinchi o‘rinda. Rahbariyat tomonidan kecha mening nomzodim tasdiqlandi. Menga terma jamoa begona emas, bu libosda ko‘p yillar harakat qilganmiz, murabbiy va yordamchi murabbiy sifatida ham ishlaganmiz. Shu sabab, terma jamoa doim men uchun birinchi o‘rinda turadi. Bizga vazifa berildi, buni askardek bajarishimiz kerak. Yig‘inga yetib keldik, bugun birinchi kun. Yigitlar bilan chiqishib ketdik. O‘ylaymanki hammasi yaxshi bo‘ladi. Mart oyida oldimizda muhim ikki o‘yin turibdi. Unga oz muddat qoldi. Oldimizga qo‘yilgan vazifa - Jahon chempionati. Eng muhim o‘yinlar turibdi. Qiyin pallada kelishga to‘g‘ri keldi. Bosim va ma’suliyat bor. Nima kerak bo‘lsa, barchasini qilamiz. Bizda boshqa yo‘l yo‘q. Futbolchilarning g‘alaba uchun qobiliyati bemalol yetadi. Muxlislar bilan birgalikda biz katta kuchmiz. O‘ylaymanki, futbolchilar va muxlislar birgalikda kerakli natijani qo‘lga kiritamiz", - dedi Kapadze.
