Ўзбекистон миллий терма жамоаси бош мураббийига айланган Тимур Кападзе "оқ бўрилар"нинг Дубайдаги йиғинига етиб борди. Мураббий бу лавозимга тайинланиши ҳақида ўз фикрларини билдирди.
"Биринчи навбатда Сречко Катанецга соғлик тилаймиз. Ҳаммамиз Сречконинг ўзи жамоани охиригача олиб боришини хоҳлар эдик, аммо бу бизнинг қўлимизда эмас. Соғлик биринчи ўринда. Раҳбарият томонидан кеча менинг номзодим тасдиқланди. Менга терма жамоа бегона эмас, бу либосда кўп йиллар ҳаракат қилганмиз, мураббий ва ёрдамчи мураббий сифатида ҳам ишлаганмиз. Шу сабаб, терма жамоа доим мен учун биринчи ўринда туради. Бизга вазифа берилди, буни аскардек бажаришимиз керак. Йиғинга етиб келдик, бугун биринчи кун. Йигитлар билан чиқишиб кетдик. Ўйлайманки ҳаммаси яхши бўлади. Март ойида олдимизда муҳим икки ўйин турибди. Унга оз муддат қолди. Олдимизга қўйилган вазифа - Жаҳон чемпионати. Энг муҳим ўйинлар турибди. Қийин паллада келишга тўғри келди. Босим ва маъсулият бор. Нима керак бўлса, барчасини қиламиз. Бизда бошқа йўл йўқ. Футболчиларнинг ғалаба учун қобилияти бемалол етади. Мухлислар билан биргаликда биз катта кучмиз. Ўйлайманки, футболчилар ва мухлислар биргаликда керакли натижани қўлга киритамиз", - деди Кападзе.
