Bugun, 30 yanvar sanasida O‘zbekiston futzal federasiyasi prezidenti Bekzod Mamatqulov Latviya futbol federasiyasi prezidenti Vadim Lashenko bilan uchrashdi.
O‘zbekistonning Latviyadagi favqulodda va muxtor elchisi Timur Rahmonov hamrohligida o‘tgan uchrashuv davomida har ikki davlat futzal federasiyalari o‘rtasida qator yo‘nalishlar bo‘yicha hamkorlikni yo‘lga qo‘yish, do‘stona aloqalarini mustahkamlash borasida kelishib olindi. Shuningdek, Vadim Lashenko mehmonlarni Latviya futbol federasiyasi infratuzilmasi va sportchilar uchun yaratilgan shart-sharoitlar bilan yaqindan tanishtirdi.
Bundan tashqari, O‘zbekiston terma jamoalari bosh murabbiylari Latviyada malakasini oshirishi hamda u yerdagi hamkasblari bilan tajriba almashishi uchun imkoniyat yaratib berish, shu yilning birinchi yarmida O‘zbekiston va Latviya futzal terma jamoalari o‘rtasida o‘rtoqlik uchrashuvi tashkil etish borasida qaror qabul qilindi.
Ta’kidlash lozim, 2023 yil iyul oyida Vadim Lashenko qit’ada futzal va sohil futbolini rivojlantirishga javobgar bo‘lgan UEFAning futzal va sohil futboli bo‘yicha Qo‘mitasi rahbarligiga tayinlangan. Natijada, u UEFA qo‘mitasi raisligiga tayinlangan birinchi latviyalikka aylangan.
Eslatib o‘tamiz, futzal bo‘yicha "Evro-2026" musobaqasiga Litva va Latviya mezbonlik qiladi.
