Бугун, 30 январь санасида Ўзбекистон футзал федерацияси президенти Бекзод Маматқулов Латвия футбол федерацияси президенти Вадим Лашенко билан учрашди.
Ўзбекистоннинг Латвиядаги фавқулодда ва мухтор элчиси Тимур Раҳмонов ҳамроҳлигида ўтган учрашув давомида ҳар икки давлат футзал федерациялари ўртасида қатор йўналишлар бўйича ҳамкорликни йўлга қўйиш, дўстона алоқаларини мустаҳкамлаш борасида келишиб олинди. Шунингдек, Вадим Лашенко меҳмонларни Латвия футбол федерацияси инфратузилмаси ва спортчилар учун яратилган шарт-шароитлар билан яқиндан таништирди.
Бундан ташқари, Ўзбекистон терма жамоалари бош мураббийлари Латвияда малакасини ошириши ҳамда у ердаги ҳамкасблари билан тажриба алмашиши учун имконият яратиб бериш, шу йилнинг биринчи ярмида Ўзбекистон ва Латвия футзал терма жамоалари ўртасида ўртоқлик учрашуви ташкил этиш борасида қарор қабул қилинди.
Таъкидлаш лозим, 2023 йил июль ойида Вадим Лашенко қитъада футзал ва соҳил футболини ривожлантиришга жавобгар бўлган УЕФАнинг футзал ва соҳил футболи бўйича Қўмитаси раҳбарлигига тайинланган. Натижада, у УЕФА қўмитаси раислигига тайинланган биринчи латвияликка айланган.
Эслатиб ўтамиз, футзал бўйича "Евро-2026" мусобақасига Литва ва Латвия мезбонлик қилади.
