"Andijon"ning "Voysberg" (Avstriya) hamda "Raufoss" (Norvegiya) klublariga qarshi o‘yinlaridan so‘ng jamoa bosh murabbiyi Aleksandr Xomyakov klub matbuot xizmati uchun o‘z taassurotlari bilan o‘rtoqlashdi.
"Tig‘iz kun bo‘ldi. Biz buni "dabl geym" deb ataymiz. Bir kunda ikkita o‘yinni o‘tkazish oson emas. Maydonga tushgan futbolchilarimiz 90 daqiqa mobaynida to‘liq kuch bilan o‘ynadilar. Bevosita uchrashuvlarga kelsak, ikkalasi ham bir-biridan qiziqarli kechdi va har ikki bahsda ham vaziyatlar yarata oldik. Bu oddiy o‘yinlar bo‘lmadi.
Avstriya jamoasi zamonaviy futbol namoyish etdi. Rostini aytsam, raqibdan bunday o‘yinni kutmagan edim, menga yoqdi. Garchi, ularga hisobda yutqazgan bo‘lsak-da, o‘yin borasida ko‘p jabhalarda raqibdan ustunlik qildik. O‘zimizning klub haqida tanqidiy xulosa chiqara olmayman. Chunki safimizga yangi futbolchilar kelib qo‘shilgan va bir-birlarini tushunib olishlari uchun vaqt kerak bo‘ladi. Muhimi, hammasi reja asosida ketyapti va o‘yindan qoniqdim.
Ikkinchi o‘yinga kelsak, Norvegiya futboli vakili butunlay boshqacha – jismoniy kuchga tayangan holda to‘p surdi. Raqib bu jabhada ustunroq ekanligini namoyish eta oldi. Meni uchrashuvning dastlabki 20-30 daqiqasida yomon o‘ynamaganimiz quvontirdi. Biz yaratmoqchi bo‘lgan o‘yinni ko‘rsata oldik, lekin hammasi ham o‘xshamadi. Ammo bundan fojea yasash kerak emas. Chunki boya aytganimdek, hammasi reja asosida ketmoqda. Har ikkala jamoa navbati bilan hujumlarga o‘tishdi. To‘g‘ri harakatlanib, to‘pga egalik qildik. Ha, imkoniyatlar bo‘ldi, ammo u qadar ko‘p emas. Nazorat bellashuvlarida hisob unchalik katta ahamiyat kasb etmaydi. Asosiysi, futbolchilar bir-birini tushunib, o‘z o‘yinimizni topish ustida ishlashga kirishganlar.
Umuman olganda, biz deyarli yangi jamoa tuzmoqdamiz. To‘g‘ri, bunga hali vaqt kerak. Xullas, men bu mag‘lubiyatlardan fojea yasamoqchi emasman. Qo‘rqinchli joyi yo‘q. Yuqorida aytib o‘tganimdek, ishlar reja asosida ketmoqda. Ishlashda davom etamiz. O‘z o‘yinimizni topib boryapmiz va shu ruhda harakatni olib boramiz".
