«Real Madrid» va «Manchester Yunayted» jamoalarida o‘ynagan sobiq markaziy himoyachi Rafael Varan ikki klubning boshqaruv tizimidagi asosiy farqlar haqida gapirdi.

«Hatto o‘yinchi sifatida ham barchasi qanday ishlashini aniq tushunish mumkin emas edi. Ko‘p yillar davomida aniq metodologiya mavjud bo‘lmadi. «Real»da klubning har bir darajasida muayyan ish yuritish tartibi bor. Ammo «Manchester Yunayted»da futbolchilarni qanday jalb qilish, qanday o‘ynash, qanday muloqot qilish borasida aniq yo‘nalishlar yo‘q edi. Bir xil jarayonlar, tizim va tuzilma mavjud emas edi.

Bu bitta insonning aybi emas. Muammo shundaki, biz xatoni kimdan izlashni ham bilmasdik. Masala butun klub tuzilmasida edi. Qarorlarni qabul qilish jarayoniga juda ko‘p odamlar jalb qilingan, shuning uchun biz aslida kim qaror qabul qilayotganini ham bilmasdik. Mas’uliyat kimda ekanligini aniq ayta olmayman, chunki bu barchaga oz-ozdan, biroq hech kimga to‘liq tegishli emas edi», — deya Varanning so‘zlarini keltiradi New York Times.