"Manchester Yunayted" klubi qanot hujumchisi Antoni "Liverpul"da vinger Muhammad Salohning o‘rnini egallashi mumkinligini esladi. Ayni paytda braziliyalik futbolchi "Betis" safida ijara asosida to‘p tepmoqda.

"Bu to‘g‘ri. "Liverpul" bilan shartnoma imzolashga juda yaqin edim, ammo nima bo‘lishi mumkinligini hech kim bilmaydi. Oxir-oqibat "Manchester Yunayted"ga o‘tdim va u yerda ajoyib vaqt o‘tkazdim. Bu yaxshi tanlov edi.

Saloh uzoq vaqt davomida g‘ayrioddiy narsalar qiladigan aql bovar qilmaydigan o‘yinchi. U ajoyib futbolchi. U hozir dunyoning eng yaxshisi yoki yo‘qligini bilmayman, lekin u, shubhasiz, eng yaxshilardan biri va "Oltin to‘p" uchun jiddiy kurashmoqda," - deya Antonining so‘zlarini keltiradi «Marca».

Eslatib o‘tamiz, Antoni "Liverpul"ga o‘tishi mumkinligi haqidagi mish-mishlar braziliyalik futbolchi "Ayaks" a’zosi bo‘lgan 2022 yilning yozida paydo bo‘lgandi.