Braziliya terma jamoasi tarkibida ikki karra jahon chempioni bo‘lgan Ronaldo Braziliya futbol konfederasiyasi prezidenti lavozimi uchun kurashmaslikka qaror qilganini aytdi.

"Keyingi saylovlarda Braziliya futbol konfederasiyasi prezidenti lavozimiga nomzodimni qo‘yish niyatim haqida jamoatchilikka e’lon qilganimdan so‘ng, rasman bu qarorimdan voz kechayotganimni ma’lum qilaman. Agar qaror qabul qilish huquqiga ega bo‘lgan aksariyat insonlar Braziliya futboli ishonchli qo‘llarda deb hisoblashsa, mening fikrim ahamiyatsiz.

Agar saylanganimda, birinchi qadamlarim klublarga ovoz berish huquqini berish va shtatlarda futbolni rivojlantirish uchun mahalliy federasiyalar fikriga ko‘proq e’tibor qaratish bo‘lardi. 27 ta federasiya bilan dastlabki muloqotimda 23 ta yopiq eshikka duch keldim. Federasiyalar men bilan uchrashishdan bosh tortdi va ular amaldagi ma’muriyatdan mamnun ekanliklarini bildirdi. Men o‘z loyihamni taqdim etish, g‘oyalarim bilan o‘rtoqlashish va ularni o‘zim istagan tarzda tushuntirish imkoniyatiga ega bo‘lmadim. Ko‘pchilik rahbarlar amaldagi prezidentni qo‘llab-quvvatlamoqda, bu – ularning huquqi va men uni hurmat qilaman. Men tashabbusimga qiziqish bildirganlarning barchasiga minnatdorchilik bildiraman va Braziliya futbolini rivojlantirish yo‘li muloqot, shaffoflik va birdamlikdan iborat, deb ishonishda davom etaman", — deb yozgan Ronaldu o‘z ijtimoiy tarmoq sahifasida.

Braziliya terma jamoasining sobiq futbolchisi Ronaldo faoliyati davomida «Kruzeyro», PSV, «Barselona», «Inter», «Real», «Milan» va «Korintians» jamoalarida to‘p surgan. U 2011 yilda professional futbolchilik faoliyatini yakunlagan. Jami karyerasi davomida braziliyalik hujumchi 735 ta o‘yinda maydonga tushib, 512 ta gol urgan.