"Yuventus" yulduzi Kenan Yildiz mavsumni Tyago Mottaning rejalaridagi asosiy futbolchi sifatida boshladi, ammo agar foydali taklif tushsa, turinliklar uni shu yozdayoq sotishga tayyor bo‘lishi mumkin.

Tyago Motta dastlab 19 yoshli turkiyalik futbolchiga faol ishongan va mavsumning dastlabki oylarida uni muntazam ravishda maydonga tushirgandi. Ammo so‘nggi paytlarda vaziyat o‘zgardi - Yildiz tobora kamroq o‘yin amaliyotiga ega bo‘lmoqda.

Jurnalist Daniele Longoning yozishicha, "Yuventus" Yildizni juda qadrlasa-da, uni daxlsiz deb hisoblamaydi. Ayniqsa, agar jamoa Chempionlar ligasiga chiqa olmasa, bu jiddiy moliyaviy zarba bo‘ladi.

Bir necha hafta oldin Turinga taniqli agent Jorje Mendesh kelgan va u "Yuve" rahbariyati bilan ham, futbolchining oilasi bilan ham uchrashgandi. Ayniqsa, "Aston Villa" turk iste’dodiga qiziqish bildirganidan so‘ng, uning transferi haqida mish-mishlar tarqaldi.

Ma’lum bo‘lishicha, "Yuventus" sport direktori Krishtiano Juntoli futbolchining narxini 75-80 million yevro etib belgilagan.