"Milan" va Fransiya terma jamoasi darvozaboni Mayk Menyan agar klub UYEFA Chempionlar Ligasi yo‘llanmasini qo‘lga kirita olmasa, yozda jamoani tark etadi. TEAMtalk nashri xabariga ko‘ra, bu holatda fransiyalik futbolchi 2026 yilning yozida tugaydigan shartnomasini uzaytirmaydi. Darvozabonga "Chelsi" qiziqish bildirmoqda.
Eslatib o‘tamiz, avvalroq OAVda Menyan va "Milan" o‘rtasida shartnomani 2028 yilgacha uzaytirish bo‘yicha og‘zaki kelishuv bo‘lgani, ammo "Milan" klubi darvozabonning o‘yin darajasidan norozi bo‘lgani uchun tanaffus olgani haqida xabar berilgandi.
Manbaga ko‘ra, milanliklar bir yildan so‘ng darvozabonni erkin agentga yo‘qotish xavfi tufayli yozda Menyan bo‘yicha arzon takliflarni qabul qilishga majbur bo‘ladi. Qayd etilishicha, fransiyalik posbonga "Chelsi"dan tashqari "Aston Villa" ham qiziqish bildirmoqda. Transfer summasi 40 million yevroni tashkil qilishi mumkin.
Chempionat yakuniga to‘qqiz tur qolganida "Milan" 47 ochko bilan A Seriya turnir jadvalida 9-o‘rinda bormoqda. Chempionlar ligasi zonasi orasidagi farq olti ochkoni tashkil etadi.
