"Милан" ва Франция терма жамоаси дарвозабони Майк Меньян агар клуб УЕФА Чемпионлар Лигаси йўлланмасини қўлга кирита олмаса, ёзда жамоани тарк этади. TEAMtalk нашри хабарига кўра, бу ҳолатда франциялик футболчи 2026 йилнинг ёзида тугайдиган шартномасини узайтирмайди. Дарвозабонга "Челси" қизиқиш билдирмоқда.

Эслатиб ўтамиз, аввалроқ ОАВда Меньян ва "Милан" ўртасида шартномани 2028 йилгача узайтириш бўйича оғзаки келишув бўлгани, аммо "Милан" клуби дарвозабоннинг ўйин даражасидан норози бўлгани учун танаффус олгани ҳақида хабар берилганди.

Манбага кўра, миланликлар бир йилдан сўнг дарвозабонни эркин агентга йўқотиш хавфи туфайли ёзда Меньян бўйича арзон таклифларни қабул қилишга мажбур бўлади. Қайд этилишича, франциялик посбонга "Челси"дан ташқари "Астон Вилла" ҳам қизиқиш билдирмоқда. Трансфер суммаси 40 миллион еврони ташкил қилиши мумкин.

Чемпионат якунига тўққиз тур қолганида "Милан" 47 очко билан А Серия турнир жадвалида 9-ўринда бормоқда. Чемпионлар лигаси зонаси орасидаги фарқ олти очкони ташкил этади.