Radio Marca журналисти Тинтонинг хабар беришича, Килиан Мбаппе "Реал" раҳбариятининг айрим қарорларидан норози.
Манба маълумотига кўра, француз футболчиси клубдан "Олтин тўп" учун унинг номзодини қўллаб-қувватлашга қаратилган махсус кампания ташкил этишни сўраган. Бироқ Мадрид клуби бу илтимосни рад этган.
"Мендаги маълумотларга кўра, Мадрид дербисидан бир ҳафта олдин Мбаппе "Реал" раҳбариятидан унинг "Олтин тўп" учун номзодини қўллаб-қувватлаш мақсадида ҳаракат қилиш ва махсус кампания бошлашни сўраган.
Аммо клуб Килианнинг илтимосини рад этган. Шунинг учун энди унинг "Атлетико"га қарши нега бунчалик ёмон ўйнаганини тушуняпман. Менимча, бу айнан шу воқеа ва унинг норозилиги билан боғлиқ", — деди Тинто.
Килиан Мбаппе 2024 йилдан буён "Реал" сафида тўп тепмоқда. Мадридликлар француз футболчисини эркин агент сифатида қўлга киритган.
Мбаппенинг клуб билан шартномаси 2029 йил ёзигача амал қилади. Transfermarkt унинг трансфер қийматини 200 миллион еврога баҳоламоқда.
