Yaqinda Eronning Football360 nashri o‘zbek futboli Erondan o‘tib ketdi sarlavhasi ostida katta maqola e’lon qildi. “Daryo” taniqli sharhlovchi Mirzahakim To‘xtamirzayevning bu boradagi fikrlari bilan qiziqdi.

Mutaxassisning fikricha, O‘zbekiston futboli hali ham Erondan ortda qolmoqda. Umuman olganda, milliy jamoa Osiyoda Yaponiya va Erondan keyin 3-o‘rinda turibdi.

"Rostini aytsam, Eron futboli hamon bizdan hamon oldinda. Biz o‘tib ketishga harakat qilmoqdamiz. Fikrimcha, Abduqodir Husanov “Siti”ga o‘tgani, uni Vinisius Junior kabi yulduzlarga qarshi o‘ynab, unga 90 daqiqa davomida o‘yin bermagani sabab forslar bu kabi fikrlarni ilgari surmoqda. Agar tarozining boshqa pallasiga hujum chizig‘imizni qo‘ysak, Eron — O‘zbekiston bahsida harakat qilgan Sardor Azmun va Mehdi Taremi kabi yetakchilari evaziga forslarning old chizig‘idagi hujumchilar biznikilardan ustunroq. Himoya chizig‘ida esa o‘zbekistonliklar raqibidan yaxshiroq. Ta’kidlash kerakki, yoshlar hamda o‘smirlar terma jamoalari o‘rtasidagi kattaroq turnirlarga e’tibor qaratsak, deyarli barchasining finaliga O‘zbekiston terma jamoasi qatnashgan. Qolaversa, o‘tgan yili tarixda ilk marta Olimpiyada yo‘llanmasiga ham ega chiqildi. Shuning hisobiga nafaqat Eron, balki boshqa nufuzli nashrlar ham terma jamoamizni tobora kuchayib borayotganini aytishmoqda. Fikrimcha, O‘zbekiston — hozirda Osiyoning Yaponiya va Erondan keyingi 3-jamoasi", deydi Mirzahakim To‘xtamirzayev “Daryo” nashri bilan suhbatda.