Яқинда Эроннинг Football360 нашри ўзбек футболи Эрондан ўтиб кетди сарлавҳаси остида катта мақола эълон қилди. “Дарё” таниқли шарҳловчи Мирзаҳаким Тўхтамирзаевнинг бу борадаги фикрлари билан қизиқди.

Мутахассиснинг фикрича, Ўзбекистон футболи ҳали ҳам Эрондан ортда қолмоқда. Умуман олганда, миллий жамоа Осиёда Япония ва Эрондан кейин 3-ўринда турибди.

"Ростини айтсам, Эрон футболи ҳамон биздан ҳамон олдинда. Биз ўтиб кетишга ҳаракат қилмоқдамиз. Фикримча, Абдуқодир Ҳусанов “Сити”га ўтгани, уни Винисиус Жуниор каби юлдузларга қарши ўйнаб, унга 90 дақиқа давомида ўйин бермагани сабаб форслар бу каби фикрларни илгари сурмоқда. Агар тарозининг бошқа палласига ҳужум чизиғимизни қўйсак, Эрон — Ўзбекистон баҳсида ҳаракат қилган Сардор Азмун ва Меҳди Тареми каби етакчилари эвазига форсларнинг олд чизиғидаги ҳужумчилар бизникилардан устунроқ. Ҳимоя чизиғида эса ўзбекистонликлар рақибидан яхшироқ. Таъкидлаш керакки, ёшлар ҳамда ўсмирлар терма жамоалари ўртасидаги каттароқ турнирларга эътибор қаратсак, деярли барчасининг финалига Ўзбекистон терма жамоаси қатнашган. Қолаверса, ўтган йили тарихда илк марта Олимпияда йўлланмасига ҳам эга чиқилди. Шунинг ҳисобига нафақат Эрон, балки бошқа нуфузли нашрлар ҳам терма жамоамизни тобора кучайиб бораётганини айтишмоқда. Фикримча, Ўзбекистон — ҳозирда Осиёнинг Япония ва Эрондан кейинги 3-жамоаси", дейди Мирзаҳаким Тўхтамирзаев “Дарё” нашри билан суҳбатда.