UEFA rasmiy saytida Madridning «Real» klubi futbolchilari Kilian Mbappe, Antonio Ryudiger va Daniel Sebalyosga nisbatan intizomiy ish bo‘yicha qaror qabul qilingani haqida ma’lum qilindi. Ular avvalroq Chempionlar ligasi 1/8 finali javob bahsida «Atletiko»ga qarshi o‘yinda (1:0, 4:2 pen.) nomaqbul xatti-harakatlar sodir etganlikda ayblangan edi.

Ryudiger 40 ming, Mbappe esa 30 ming yevro miqdorida jarimaga tortilib, har ikki futbolchiga UEFA musobaqalarida bir o‘yinlik shartli diskvalifikasiya tayinlandi. Agar ular bir yil davomida yana shunday qoidabuzarlik qilsa, diskvalifikasiya amalga oshiriladi.

Sebalyos esa 20 ming yevro miqdorida jarimaga tortildi, biroq u diskvalifikasiya qilinmadi.

Shuningdek, UEFAning axloq va intizom inspektori mazkur uchrashuvda «Real» hujumchisi Vinisius Juniorning xatti-harakatini ham o‘rgangan, biroq natijada unga nisbatan intizomiy ish ochilmadi.

Avvalroq OAVda «Atletiko» klubi «Real» futbolchilarining xatti-harakatlaridan shikoyat qilib, UEFAga videolavhalar yuborgani haqida xabar berilgan edi. Ushbu videolarda Vinisius Junior va Ryudiger raqib muxlislarini qo‘zg‘atuvchi ishoralar qilgani, Mbappe esa «Atletiko» futbolchilariga nisbatan haqoratomuz harakatlar ko‘rsatgani aks etgan. Keyinroq UYEFA mazkur futbolchilarga nisbatan intizomiy ish ochdi.