Argentina terma jamoasi murabbiylar shtabi 2026 yilgi Jahon chempionati uchun yakuniy tarkibni e’lon qildi. Ro‘yxatni topshirishning oxirgi muddati 30 may etib belgilangan edi, kengaytirilgan tarkib esa 11 may kuni ma’lum qilingandi. Eslatib o‘tamiz, argentinaliklar so‘nggi mundial g‘oliblari hisoblanadi.
«Inter Mayami»ning 38 yoshli hujumchisi Lionel Messi MLS doirasidagi «Filadelfiya»ga qarshi o‘yinda jarohat olganiga qaramay, 26 kishilik tarkibga kiritildi. Bu uning faoliyatidagi ketma-ket oltinchi Jahon chempionati bo‘ladi. Messi shu vaqtgacha mundiallarda 26 ta o‘yin o‘tkazib, 13 ta gol urgan va 8 ta golli uzatmani amalga oshirgan.
Terma jamoaning to‘liq tarkibi:
-
Darvozabonlar: Emiliano Martines («Aston Villa», Angliya), Xeronimo Rulli («Marsel», Fransiya), Xuan Musso («Atletiko», Ispaniya).
-
Himoyachilar: Nauel Molina («Atletiko», Ispaniya), Nikolas Otamendi («Benfika», Portugaliya), Kristian Romero («Tottenxem», Angliya), Nikolas Talyafiko («Lion», Fransiya), Lisandro Martines («Manchester Yunayted», Angliya), Gonsalo Montiel («River Pleyt»), Fakundo Medina, Leonardo Balerdi (ikkisi ham — «Marsel», Fransiya).
-
Yarim himoyachilar: Valentin Barko («Strasbur», Fransiya), Djovani Lo Chelso («Betis», Ispaniya), Leandro Paredes («Boka Xuniors»), Rodrigo De Paul («Inter Mayami», AQSH), Enso Fernandes («Chelsi», Angliya), Aleksis Mak Allister («Liverpul», Angliya), Eksekiel Palasios («Bayer», Germaniya).
-
Hujumchilar: Niko Pas («Komo», Italiya), Xose Manuel Lopes («Palmeyras», Braziliya), Lionel Messi («Inter Mayami», AQSH), Lautaro Martines («Inter», Italiya), Djuliano Simeone, Nikolas Gonsales, Tyago Almada, Xulian Alvares (barchasi — «Atletiko», Ispaniya).
2026 yilgi Jahon chempionati 11 iyundan 19 iyulgacha AQSH, Kanada va Meksikada bo‘lib o‘tadi. Argentina terma jamoasi «J» guruhida Avstriya, Jazoir va Iordaniya bilan kuch sinashadi.
