Agar UEFA Rossiya klublari va terma jamoalariga qo‘yilgan cheklovlarni bekor qilsa, mamlakatning to‘rt klubi 2027/28-yilgi mavsumda Yevrokuboklarda ishtirok etishi mumkin. Bu haqda UEFA tomonidan e’lon qilingan hujjatlarda ma’lum qilingan.
Unga ko‘ra, 2026/2027-yilgi mavsum Rossiya chempioni Chempionlar Ligasining 1-saralash bosqichidan ishtirok etadi. Mamlakat Kubogi g‘olibi Yevropa Ligasining 1-saralash bosqichida qatnashadi.
Rossiya chempionatida 2 va 3-o‘rinlarni egallagan klublar esa Konferensiyalar Ligasining 2-saralash bosqichidan musobaqaga qo‘shilishi mumkin. UEFA hujjatida bu hozircha dastlabki qadam ekani va yakuniy qaror mavsum oxirigacha qabul qilinishi aytilgan.
Ma’lumot uchun, Rossiya terma jamoalari va klublari 2022-yildan buyon xalqaro musobaqalarda ishtirok etmayapti. 27 avgust kuni UEFA prezidenti Aleksander Cheferin Rossiya terma jamoalari va klublarini musobaqalarga qaytarish masalasi Ukrainadagi mojaro yakunlanganidan keyin ko‘rib chiqilishi mumkinligini aytgandi.
Eslatib o‘tamiz, FIFA va UEFA 2022 yil fevral oyida Ukrainadagi voqealar sabab Rossiya terma jamoalari hamda klublarini xalqaro musobaqalardan noma’lum muddatga chetlatgandi.
