“Paxtakor” klubining sport bo‘yicha prezident maslahatchisi Maksim Shaskix “Manchester Siti” safida to‘p surayotgan O‘zbekiston terma jamoasi himoyachisi Abdukodir Husanov haqida o‘z fikrlarini bildirib o‘tdi.
U “Sports24.kz” nashriga bergan intervyusida Husanovni boshqa mashhur himoyachilar bilan solishtirib, uning shaxsiy fazilatlariga alohida urg‘u berdi.
"Puyol bilan solishtirib bo‘lmaydi. U boshqa – juda hissiyotli futbolchi edi. Husanov — madaniyatli, tarbiyali va kamgap yigit. Balki vaqt o‘tib, maydondagi xarakteri o‘zgarar, ammo hozir Abduqodir indamay o‘z ishini qiladi", deydi Shaskix.
Maksim Shaskix, shuningdek, Husanovni Pepe bilan taqqoslashga harakat qildi, lekin bu ham to‘liq o‘xshash emasligini aytdi:
"Pepe yoshligida boshqacha edi, keyinchalik tezligini yo‘qotib, boshqa yo‘l bilan o‘yin uslubini kuchaytirdi. Balki bu jihatdan Husanovda biroz o‘xshashlik bor. Lekin u Husanov bo‘lib qolaversin – bu yetarli".
Eslatib o‘tamiz, Abdukodir Husanov 2024/25 yilgi qishki transfer oynasida Fransiyaning “Lans” klubidan “Manchester Siti”ga ko‘chib o‘tdi. Hozirga qadar u barcha musobaqalarda 9 ta o‘yin o‘tkazib, 1 gol muallifiga aylangan.
