Rafael Leauning fikricha, Italiya kubogidagi g‘alaba "Milan" yomon mavsumini qutqarib qolishi mumkin.

Chorshanba kuni "rossonerilar" Italiya kubogi yarim final javob o‘yinida "Inter"ga qarshi bahs olib boradi (birinchi o‘yin - 1:1).

"G‘alaba uchun borimizni berishimiz, finalga chiqishimiz va barcha muxlislarimizni xursand qilishimiz kerak. Bu juda qiyin o‘tayotgan mavsumda muhim.

Bu derbi, ko‘p gapirishning hojati yo‘q. Biz o‘yinga g‘alaba uchun to‘g‘ri kayfiyat bilan yondashishimiz va bu sovrinni qo‘lga kiritishga qodir ekanimizga ishonishimiz kerak. Bu mavsumimizni o‘zgartirishi mumkin bo‘lgan o‘ta muhim o‘yin. Bu so‘nggi imkoniyat," - dedi "Milan" vingeri.

Mavsum davomida "rossonerilar" Italiya Superkubogini qo‘lga kiritgan va "Feyenoord" (0:1, 1:1) bilan o‘tish o‘yinlaridan so‘ng Chempionlar Ligasini tark etishgandi.

Serjiu Konseysau jamoasi 33-turdan so‘ng A Seriyada 9-o‘rinni egallab turibdi.