"Liverpul" hujumchisi Muhammad Saloh nima uchun avvalgidan ham ko‘proq gol va golli uzatmalarni amalga oshirayotganini aytib o‘tdi.
Yakshanba kuni "qizillar" "Tottenxem"ni tor-mor etib (5:1), chempionlikni qo‘lga kiritgan bo‘lsa, misrlik futbolchi yana bir bor raqib darvozasini ishg‘ol qildi. Endilikda hujumchi APLda 34 ta o‘yinda 28 ta gol va 18 ta assistni o‘z hisobiga yozdirib qo‘ydi - u ikkala ko‘rsatkich bo‘yicha ham chempionatda ishonchli yetakchilik qilmoqda.
"Slot boshchiligida mendan ko‘p himoyalanish talab etilmaydi - taktika butunlay boshqacha. Men unga: "Menga himoyada dam olishga ruxsat bersang, men hujumda natijani ta’minlayman," dedim. Shunday bo‘lganidan xursandman. U mening gaplarimga quloq soldi va endi qanday ko‘rsatkichlarga ega ekanligimni ko‘rib turibsiz," - deya Salohning so‘zlarini keltiradi jurnalist Ben Jeykobs.
