Karlo Anchelottining «Real Madrid» bosh murabbiyi sifatidagi kelajagi Chempionlar Ligasining chorak finalida «Arsenal»ga qarshi o‘yinda mag‘lubiyatga uchraganidan so‘ng jiddiy so‘roq ostida qoldi. Yevropaning ushbu musobaqasi har bir mavsumda Madrid klubi uchun asosiy maqsad bo‘lib hisoblanadi, va bu mag‘lubiyat jamoa uchun yagona omadsizlik bo‘lib qolmadi — Kubok ham boy berildi. Hozircha La Liga imkoniyati saqlanib qolmoqda va aynan shu natija klub uchun muhim qarorni belgilab beradi.

Anchelotti o‘zining "Real"dagi taqdiri 11 may kuni «Monjuik»da bo‘ladigan «el- klasiko»da hal bo‘lishini biladi.

«Klasiko»gacha «Real Madrid» yana bir uchrashuv o‘tkazadi — «Selta»ni o‘z maydonida mag‘lub etishi kerak. Shunda La liga g‘olibligi uchun imkoniyatni saqlab qoladi.

«Barselona»ning «Valyadolid»ga qarshi bahsda ochko yo‘qotishi ehtimoli past, chunki raqib jamoa Primeradan tushib ketgan.

Har qanday ssenariyda, agar «Madrid» chempion bo‘lishni istasa va «Barsa»dan o‘tib ketishni maqsad qilgan bo‘lsa, 11 may kuni g‘alaba qozonishi shart. O‘sha kungi natija Anchelotti qanday oqibat keltirib chiqarishini murabbiy yaxshi biladi: yoki u lavozimini saqlab qolish imkoniyatiga ega bo‘ladi (hech bo‘lmasa iyun-iyul oylarida bo‘lib o‘tadigan Klublar o‘rtasidagi Jahon chempionatigacha), yoki iste’foga chiqib, yangi manzilga yo‘l oladi.

Yangi manzil — Braziliya?

Bu yangi manzil — Braziliya bo‘lishi mumkin. Braziliya futbol konfederasiyasi (CBF) Anchelottiga bosimni davom ettirmoqda. Ularning vakili «Madrid»ning bir necha uchrashuvlarida, jumladan «Arsenal»ga qarshi uchrashuv va Ispaniya Kubogi finalida ham qatnashdi. Anchelottining «Real»dan ketishi aniq bo‘lsa, braziliyaliklar unga tezroq shartnoma taklif etishni va ikki yildan beri davom etayotgan qidiruvga nuqta qo‘yishni istaydilar.