Madridning "Real" klubi himoyachisi Antonio Ryudiger tizzasidan qilingan operasiyadan so‘ng bayonot berdi.

"Etti oydan ortiq vaqt davomida kuchli og‘riq bilan o‘ynaganimdan so‘ng, afsuski, tizzamdan jarrohlik amaliyotini o‘tkazishimga to‘g‘ri keldi. Endi, nihoyat, yana og‘riqdan xalos bo‘ldim - operasiya muvaffaqiyatli o‘tdi," - deb yozadi Ryudiger.

Shuningdek, Ryudiger uning imkon qadar tezroq maydonga qaytishiga umid bildirdi. "Real" himoyachisi oldinda Millatlar ligasi va klublar o‘rtasidagi jahon chempionati o‘yinlari borligini ta’kidladi. Nemis tezroq tiklanish uchun qo‘lidan kelgan barcha ishni qilishga tayyor.